കമല സുറയ്യ

ഇംഗ്ലീഷ് വിലാസം

http://ml.wikipedia.org/wiki/Kamala_Surayya

കമലാ സുരയ്യ (കമലാദാസ്)
കമലാ സുരയ്യ
ജനനം	1934 മാർച്ച് 31(1934-03-31) പുന്നയൂർക്കുളം, മലബാർ, മദ്രാസ് പ്രസിഡൻസി, ബ്രിട്ടീഷ് ഇന്ത്യ
മരണം	2009 മേയ് 31 (പ്രായം 75) പൂനെ, മഹാരാഷ്ട്ര, ഇന്ത്യ
തൂലികാനാമം	മാധവിക്കുട്ടി
തൊഴിൽ	നോവലിസ്റ്റ്, ചെറുകഥാകൃത്ത്, കവയത്രി
ദേശീയത	ഇന്ത്യ
രചനാ സങ്കേതം	നോവൽ, ചെറുകഥ കവിത
വിഷയങ്ങൾ	സാമൂഹികം
പ്രധാനപ്പെട്ട പുരസ്കാരങ്ങൾ	എഴുത്തച്ഛൻ പുരസ്കാരം,കേരള സാഹിത്യ അക്കാദമി പുരസ്കാരം
ജീവിതപങ്കാളി(കൾ)	മാധവദാസ്

ലോകപ്രശസ്തയായ മലയാളി സാഹിത്യകാരിയാണ് കമലാ സുരയ്യ (മാർച്ച് 31, 1934 - മേയ് 31, 2009) മലയാളത്തിലും ഇംഗ്ലീഷിലുമായി നിരവധി സാഹിത്യസൃഷ്ടികൾ കവിത, ചെറുകഥ, ജീവചരിത്രം എന്നിങ്ങനെ പ്രസിദ്ധീകരിച്ചിട്ടുണ്ട്. 1999-ൽ ഇസ്ലാം മതം സ്വീകരിക്കുന്നതിനു മുൻപ് മലയാള രചനകളിൽ മാധവിക്കുട്ടി എന്ന പേരിലും ഇംഗ്ലീഷ് രചനകളിൽ കമലാദാസ് എന്ന പേരിലുമാണ് അവർ രചനകൾ നടത്തിയിരുന്നത്. ഇംഗ്ലീഷിൽ കവിത എഴുതുന്ന ഇന്ത്യക്കാരിൽ പ്രമുഖയായിരുന്നു അവർ. പക്ഷേ കേരളത്തിൽ മാധവിക്കുട്ടി എന്ന തൂലികാ നാമത്തിൽ എഴുതിയ ചെറുകഥകളിലൂടെയും ജീവചരിത്രത്തിലൂടെയുമാണ് അവർ പ്രശസ്തിയാർജിച്ചത്. 1984ൽ സാഹിത്യത്തിനുള്ള നോബൽ സമ്മാനത്തിന് നാമനിർദേശം ചെയ്യപ്പെട്ടു. അനാഥരായ അമ്മമാരെയും സ്ത്രീകളെയും സംരക്ഷിക്കുവാനും മനുഷ്യത്വ പ്രവർത്തനങ്ങൾക്കുമായി ലോൿസേവാ ചാരിറ്റബിൾ ട്രസ്റ്റ് എന്ന സംഘടന ആരംഭിച്ചു. നാലപ്പാട്ടെ തന്റെ തറവാട് കേരള സാഹിത്യ അക്കാദമിക്കായി മാധവിക്കുട്ടി ഇഷ്ടദാനം കൊടുത്തു. സ്ത്രീകളുടെ ലൈംഗിക അവകാശങ്ങളെയും അഭിലാഷങ്ങളേയും കുറിച്ച് സത്യസന്ധതയോടെയും ധൈര്യത്തോടെയും എഴുതാൻ തുനിഞ്ഞ ഭാരതത്തിലെ ആദ്യത്തെ എഴുത്തുകാരി എന്ന പദവി മാധവിക്കുട്ടിക്കാണെന്ന് പല എഴുത്തുകാരും കരുതുന്നു.

ജീവിതരേഖ

1934 മാർച്ച് 31ന് തൃശൂർ ജില്ലയിലെ പുന്നയൂർക്കുളത്ത് ജനിച്ചു. അമ്മ കവയത്രിയായ ബാലാമണിയമ്മ, അച്ഛൻ മാതൃഭൂമി ദിനപ്പത്രത്തിന്റെ മുൻ മാനേജിങ് എഡിറ്ററായിരുന്ന വി.എം. നായർ അമ്മാവൻ നാലപ്പാട്ടു് നാരായണമേനോൻ. ഇന്റർനാഷണൽ മോണിറ്ററി ഫണ്ടിന്റെ (ഐ.എം.എഫ്) സീനിയർ കൺസൽടന്റായിരുന്ന മാധവദാസായിരുന്നു ഭർത്താവ് (1992 ൽ നിര്യാതനായി). 1999ൽ ഇസ്ലാം മതം സ്വീകരിച്ച് കമലാ സുറയ്യ എന്ന പേരിൽ അറിയപ്പെട്ടുതുടങ്ങി. 2009 മേയ് 31-നു് പൂനെയിൽ വെച്ചു് അന്തരിച്ചു. മക്കൾ: എം.ഡി. നാലപ്പാട്ട്, ചിന്നൻ ദാസ്, ജയസൂര്യ.

മതപരിവർത്തനം

നാലപ്പാട്ട് എന്നുപേരുള്ള ഒരു ഹിന്ദു നായർ തറവാട്ടിലാണ് കമല സുരയ്യ ജനിച്ചത്. . സാദിഖ് അലി , എന്ന പ്രണയിതാവിന്റെ നിർദ്ദേശപ്രകാരം കമലാദാസ് മുസ്ലീം മതത്തെ സ്വീകരിച്ചു. സാദിഖ് അലി , ഒരു മുസ്ലീം പണ്ഡിതനും , മുസ്ലീം ലീഗ് എം,പിയുമായിരുന്നു. . 1999 ൽ തന്റെ 65ആമത്തെ വയസ്സിൽ കമലാദാസ് , കമല സുറയ്യ എന്ന നാമം സ്വീകരിച്ചു.

രാഷ്ട്രീയം

രാഷ്ട്രീയത്തിൽ മുമ്പ് പ്രവർത്തിച്ചിട്ടില്ലെങ്കിലും , അവർ ലോക സേവാ പാർട്ടി എന്ന രാഷ്ട്രീയ സംഘടനയ്ക്ക് രൂപം കൊടുത്തു. അനാഥകളായ അമ്മമാർക്കും , മതനിരപേക്ഷതയ്ക്കും വേണ്ടിയാണ് ഈ പാർട്ടി എന്ന് രൂപീകരണവേളയിൽ പ്രഖ്യാപിച്ചു. ഇന്ത്യൻ പാർലിമെന്റിലേക്ക് നടന്ന തിരഞ്ഞെടുപ്പിൽ മത്സരിക്കുകയും ചെയ്തു.

കൃതികൾ

മലയാള ഭാഷയിൽ

കമലസുറയ്യയുടെ ആത്മകഥയായ എന്റെ കഥ - ഇംഗ്ലീഷ് അടക്കം (മൈ സ്റ്റോറി) 15 ഭാഷകളിലേക്ക് വിവർത്തനം ചെയ്യപ്പെട്ടു

• മൂന്നു നോവലുകൾ
• ഭയം എന്റെ നിശാവസ്ത്രം
• എന്റെ സ്നേഹിത അരുണ
• ചുവന്ന പാവാട
• പക്ഷിയുടെ മണം
• തണുപ്പ്
• മാനസി
• മാധവിക്കുട്ടിയുടെ തിരഞ്ഞെടുത്ത കഥകൾ
• എന്റെ കഥ (ആത്മകഥ).
• ബാല്യകാല സ്മരണകൾ
• വർഷങ്ങൾക്കു മുൻപ്
• ഡയറിക്കുറിപ്പുകൾ
• നീർമാതളം പൂത്തകാലം
• നഷ്ടപ്പെട്ട നീലാംബരി
• ചന്ദന മരങ്ങൾ
• മനോമി
• വീണ്ടും ചില കഥകൾ
• ഒറ്റയടിപ്പാത
• എന്റെ കഥകൾ
• കവാടം
• യാ അല്ലാഹ്

ഇംഗ്ലീഷ് ഭാഷയിൽ

• കൽക്കട്ടയിലെ വേനൽ (Summer in Calcutta)
• കാമത്തിന്റെ അക്ഷരങ്ങൾ (Alphabet of the lust)
• പിതൃപരമ്പര (The Descendance‌)
• പഴയ കളിവീടും മറ്റു കവിതകളും (Old Play House and Other Poems)
• തിരഞ്ഞെടുത്ത കവിതകൾ (Collected Poems‌)
• എങ്ങനെ പാടണമെന്ന് ആത്മാവിനേ അറിയൂ (Only the Soul Knows How to Sing)
• ചൂളംവിളികൾ (The Sirens)

പുരസ്കാരങ്ങൾ

• 1997 - വയലാർ അവാർഡ് - നീർമാതളം പൂത്ത കാലം
• 2002 - എഴുത്തച്ഛൻ പുരസ്കാരം
• സാഹിത്യ അക്കാദമി പുരസ്കാരം - തണുപ്പ്
• ആശാൻ വേൾഡ് പ്രൈസ്
• ഏഷ്യൻ പൊയട്രി പ്രൈസ്
• കെന്റ് അവാർഡ്