ഔറേലിയുസ് അഗസ്തീനോസ്
വിക്കിപീഡിയ, ഒരു സ്വതന്ത്ര വിജ്ഞാനകോശം.
| ഹിപ്പോയിലെ വിശുദ്ധ ആഗസ്തീനോസ് | |
|---|---|
 അഗസ്റ്റിന് Sandro Botticelli വരച്ചത്, c. 1480 |
|
| ബിഷപ്പ്, സഭാപണ്ഡിതന് | |
| ജനനം | നവംബര് 13 354, Tagaste, അള്ജീറിയ |
| മരണം | ഓഗസ്റ്റ് 28 430 (പ്രായം 75), Hippo Regius |
| വണങ്ങുന്നത് | മിക്ക ക്രിസ്ത്യന് വിഭാഗങ്ങളും |
| പ്രധാന കപ്പേള | San Pietro in Ciel d'Oro, Pavia, Italy |
| ഓര്മ്മത്തിരുന്നാള് | ഓഗസ്റ്റ് 28 (W), ജൂണ് 15 (E) |
| Attributes | child; dove; pen; shell, pierced heart |
| Patronage | brewers; printers; sore eyes; theologians |
 Saints Portal |
|
പേരുകേട്ട ക്രൈസ്തവ ദൈവശാസ്ത്രജ്ഞനും ചിന്തകനുമാണ് അഗസ്റ്റിന്. മുഴുവന് പേര് ഔറേലിയുസ് അഗസ്തീനോസ്. മലയാളത്തില് ആഗസ്തീനോസ് എന്നും ഇദ്ദേഹം അറിയപ്പെടുന്നു. വി. അഗസ്തിന്, ഹിപ്പോയിലെ അഗസ്തിന് എന്നും അറിയപ്പെടുന്നു. ആദ്യകാല സഭാപിതാക്കന്മാരില് ഏറ്റവും പ്രസിദ്ധന് അഗസ്റ്റിനാണ്.
ഉള്ളടക്കം |
[തിരുത്തുക] ജീവിതരേഖ
ഉത്തരാഫ്രിക്കയില് ഇന്നത്തെ അല്ജീരിയയിലെ തഗാസ്തയില് AD 354-ല് ജനിച്ചു. മാതാവ് ഉറച്ച ക്രിസ്തുമത വിശ്വാസിയിയായിരുന്ന വിശുദ്ധ മോനിക്ക.പിതാവ് അവിശ്വാസിയായിരുന്നു. തഗാസ്തെയിലും, ആഫ്രിക്കയിലെ പുരാതന പട്ടണമായ കാര്ത്തേജിലുമായിരുന്നു വിദ്യാഭ്യാസം. പഠനം കഴിഞ്ഞ് ആദ്യം കാര്ത്തേജിലും പിന്നീട് മിലാനിലും പ്രസംഗകല (rhetoric) പഠിപ്പിക്കുന്ന അദ്ധ്യാപകനായി. തത്ത്വചിന്തയിലെ താല്പര്യം അഗസ്റ്റിനെ മനിക്കേയന് ചിന്തയുടേയും തുടര്ന്ന് നിയോപ്ലേറ്റോണിസത്തിന്റേയും സ്വാധീനത്തിലെത്തിച്ചു. എന്നാല് അവയൊന്നും അദ്ദേഹത്തിന് സംതൃപ്തി കൊടുത്തില്ല. അഗാധമായ പാപബോധവും നിത്യവിധിയെക്കുറിച്ചുള്ള ഉല്ക്കണ്ഠയും അദ്ദേഹത്തെ അലട്ടുന്നുണ്ടായിരുന്നു. അതിനിടെ മിലാനിലെ മെത്രാനായിരുന്ന അംബ്രോസുമായി പരിചയപ്പെട്ടു. അതൊരു വഴിത്തിരിവായി. ക്രമേണ അഗസ്റ്റിന് ക്രിസ്തുമത വിശ്വാസിയായി മാറി.
അതിനിടെ അദ്ദേഹം ആഫ്രിക്കയിലേക്കു മടങ്ങി. അവിടെ ഹിപ്പോ രൂപതയുടെ മെത്രാന് പദവിയിലേക്ക് ഉയര്ത്തപ്പെട്ടു. അദ്ദേഹത്തിന്റെ ധിഷണയും പാണ്ഡിത്ത്യവും പരക്കെ ശ്രദ്ധിക്കപ്പെടാന് തുടങ്ങി. ക്രിസ്തുമതത്തിലെ പല താത്ത്വിക സമസ്യകള്ക്കും അഗസ്റ്റിന് കല്പിച്ച തീര്പ്പുകള് സഭയുടെ ഔദ്യോഗിക നിലപാടുകളായി മാറി. ഇക്കാര്യത്തില് അദ്ദേഹത്തിന് മുന്നില് നില്ക്കാനായി വിശുദ്ധ പൗലോസ് മാത്രമേയുള്ളു. ഡൊണാറ്റിസം, പെലാജിയനിസം, മനിക്കേയിസം മുതലായ വിശ്വാസത്തിലെ വിമത നിലപാടുകളോടുള്ള പോരാട്ടത്തില് സഭ അഗസ്റ്റിനെയാണ് പ്രധാനമായും ആശ്രയിച്ച്ത്. ക്രൈസ്തവ സിദ്ധാന്തങ്ങളെ തത്ത്വചിന്തയിലെ നിലപാടുകളുമായി സമരസപ്പെടുത്തുന്നതില് അദ്ദേഹം വലിയ സംഭാവന നല്കി. ദൈവശാസ്ത്രതിന് അഗസ്റ്റിന് പണിത തത്ത്വചിന്തയുടെ ചട്ടക്കൂടിന് സമാനമായി നൂറ്റാണ്ടുകളോളം മറ്റൊന്നില്ലായിരുന്നു. പതിമൂന്നാം നൂറ്റാണ്ടില് തോമസ് അക്വീനാസിന്റെ രംഗപ്രവേശനത്തോടുകൂടിയാണ് ഈ സ്ഥിതി മാറിയത്. ക്രൈസ്തവ വിഭാഗങ്ങല്ള്ക്കിടയില് അഗസ്റ്റിനുള്ള സാര്വത്രിക സ്വീകാര്യത അക്വീനാസിനില്ല എന്നും പറയേണ്ടതുണ്ട്. ലൂഥര് തുടങ്ങിയ പ്രൊട്ടസ്റ്റന്റ് നേതാക്കള് തങ്ങളുടെ നിലപാടുകള് സമര്ത്ഥിക്കാന് ആശ്രയിച്ചത് വിശുദ്ധ പൗലോസിന്റെ ലേഖനങ്ങളെയും അഗസ്റ്റിന്റെ കൃതികളെയും ആണ്. ലൂഥര് ആണെങ്കില് ഒരു അഗസ്റ്റീനിയന് സന്യാസി ആയിരുന്നു.[1]
[തിരുത്തുക] കൃതികള്
അഗസ്റ്റിന്റെ കണ്ഫെഷന്സ് എന്ന ആത്മകഥ ഏറെ പ്രസിദ്ധമാണ്. സാഹിത്യത്തിലേയും തത്ത്വചിന്തയിലേയും ഒരു ക്ലാസ്സിക് ആണത്. കണ്ഫെഷന്സ് വെറും ആത്മകഥയോ ആത്നിവേദനമോ മാത്രമല്ല. അതിന്റെ ഉത്തരഭാഗം ആഴമുള്ള തത്ത്വചിന്തയാണ്. ആ ഭാഗത്തെ ചില നിരീക്ഷണള് ആധുനിക ശാസ്ത്രത്തിന്റെ ഉള്കാഴ്ചകള്ക്കൊപ്പം വയ്ക്കാവുന്നവയാണ് എന്നു ചൂണ്ടിക്കാണിക്കപ്പെട്ടിട്ടുണ്ട്. കണ്ഫെഷന്സിലെ സമയവും നിത്ത്യതയും എന്ന അദ്ധ്യായത്തില്, സമയത്തിന്റെ സ്വഭാവത്തെക്കുറിച്ച് അഗസ്റ്റിന് നടത്തുന്ന ഒരു നിരീക്ഷണം, പ്രഖ്യാത ഊര്ജ്ജതന്ത്രജ്ഞന് സ്റ്റീഫന് ഹാക്കിങ്ങ്, സമയത്തിന്റെ ഒരു ലഘു ചരിത്രം (A Brief History of Time) എന്ന കൃതിയില് സഹമതിയോടെ ഉദ്ധരിക്കുന്നുണ്ട്. സമയവും ദൈവത്തിന്റെ സൃഷ്രടിയാണ്, സൃഷ്ടിയില്ലാതെ സമയമില്ല എന്നതാണ് ആ നിരീക്ഷണം.
സ്വന്തം പുസ്തകങ്ങളില് അഗസ്റ്റിന് ഏറ്റവും പ്രിയം ദൈവനഗരം എന്ന ബൃഹത്കൃതിയായിരുന്നു. പടിഞ്ഞാറന് റോമാ സമ്രാജ്യം, വടക്കുനിന്നു വന്ന പ്രാകൃത ഗോത്രങ്ങളുടെ ആക്രമണത്തില് തകരുന്നത് കണ്ട അഗസ്റ്റിന്റെ പ്രതികരണമാണ് ആ കൃതി. റോമാനഗരത്തെ കേന്ദ്രീകരിച്ചുള്ള മനുഷ്യനിര്മ്മിത സാമ്രാജ്യത്തിന്റെ തകര്ച്ച ചൂണ്ടിക്കാട്ടി, സ്വര്ഗ്ഗത്തിലെ ദൈവനഗരം മാത്രമേ ശാശ്വതമായുള്ളു എന്ന് പറയുകയാണ് അഗസ്റ്റിന് ആ കൃതിയില്.
ആദ്യകാല സഭാപിതാക്കന്മാരില് രചനാബാഹുല്യത്തില് ഏറ്റവും മുന്പില് നില്ക്കുന്നത് അഗസ്റ്റിനാണ്. അദ്ദേഹത്തിന്റെ രചനകള് മൊത്തമെടുത്താല് അന്പത് ലക്ഷം വാക്കുകളുണ്ട് എന്ന് പറയപ്പെടുന്നു. ഏതാണ്ട് നാല്പത് വര്ഷക്കാലം തുടര്ച്ചയായി, പ്രതിവര്ഷം ശരാശരി 300 പുറമുള്ള ഒരു പുസ്തകം വീതം അദ്ദേഹം എഴുതിക്കാണുമത്രെ. അഗസ്റ്റിന് എഴുതിയതൊക്കെ വായിച്ചിട്ടുണ്ടെന്ന് അവകാശപ്പെടുന്നയാള് നുണയനായിരിക്കുമെന്ന് സെവിലിലെ ഇസിദോര്(Isidore or Seville ക്രി പി.560-636) പറഞ്ഞത് ഇത്കൊണ്ടാണ്.[2]
[തിരുത്തുക] മരണം
AD 430-ല് ഹിപ്പോ നഗരം വാന്ഡലുകളുടെ ഉപരോധത്തിലായിരിക്കേയാണ് അഗസ്റ്റിന് മരിച്ചത്. തുടര്ന്ന് വാന്ഡലുകള് ഹിപ്പോ പിടിച്ചടക്കുകയും മിക്കവാറും നശിപ്പിക്കുകയും ചെയ്തെങ്കിലും അഗസ്റ്റിന്റെ പുസ്തകശേഖരം അവര് നശിപ്പിക്കാതെ വിട്ടു. ആ മൗലിക പ്രതിഭയുടെ സംഭാവനകള് അങ്ങനെ ഭാവിക്കായി സംരക്ഷിക്കപ്പെട്ടു.
[തിരുത്തുക] വിമര്ശനം
അഗസ്റ്റിന്റെ ധിഷണ അംഗീകരിക്കാതിരിക്കാന് ആര്ക്കും ആവില്ലെങ്കിലും, മനുഷ്യപ്രകൃതിയോടുള്ള അദ്ദേഹത്തിന്റെ സമീപനം നിഷേധാത്മകമായിരുന്നു എന്നു പരക്കെ വിമര്ശിക്കപ്പെട്ടിട്ടുണ്ട്. മനുഷ്യന്റെ ഹീനാവസ്ഥക്ക് ഊന്നല് നല്കിയ തത്ത്വചിന്തയായിരുന്നു അഗസ്റ്റിന്റേത്. ലൈംഗികതയുമായി ബന്ധപ്പെട്ട കുറ്റബോധം അദ്ദേഹത്തിന്റെ ചിന്തയേയും വ്യക്തിതത്തേയും ഒഴിയാബാധ പോലെ പിന്തുടര്ന്നു. എല്ലാ മനുഷ്യരും, വിലക്കപ്പെട്ട കനി തിന്ന് ദൈവകോപത്തിനിരയായ ആദിമാതാപിതാക്കള് ആദത്തിന്റേയും ഹവ്വയുടേയും പാപത്തിന്റെ ഉത്തരവാദിത്തവും പേറിയാണ് ജനിക്കുന്നത് എന്ന സങ്കല്പത്തെ ആധാരമാക്കിയുള്ള ജന്മപാപം എന്ന ആശയത്തെ ക്രിസ്തീയ വിശ്വാസത്തിന്റെ മധ്യസ്ഥാനത്ത് പ്രതിഷ്ഠിച്ചത് അഗസ്റ്റിനാണ്. ലൈംഗികതയോടുള്ള വ്യവസ്ഥാപിതസഭകളുടെ മുന്കാലങ്ങളിലെ നിഷേധാത്മക നിലപാട് ഏറെയും അഗസ്റ്റിനില് നിന്നു കൈപ്പറ്റിയതാണ് എന്നു പറയാം. അഗസ്റ്റിന്റെ ആത്മീയ പുരോഗതിയില് അമ്മ മോനിക്ക വലിയ പങ്കു വഹിച്ചുവെങ്കിലും സ്ത്രീ-പുരുഷ ബന്ധത്തോടുള്ള അദ്ദേഹത്തിന്റെ സമീപനം ആരോഗ്യകരമായിരുന്നു എന്നു പറയുക വയ്യ. കണ്ഫെഷന്സില് അമ്മ കൂടാതെ വേറെ മൂന്നു സ്ത്രീകള് പ്രത്യക്ഷപ്പെടുന്നുണ്ട് - ദീര്ഘകാലം ഒപ്പം ജീവിച്ച് ഒരു മകനു ജന്മം നല്കിയവളടക്കം രണ്ടു വെപ്പാട്ടിമാരും, പിന്നെ അഗസ്റ്റിന് ഒടുവില് വിവാഹം കഴിക്കാതിരുന്ന പ്രതിശ്രുധ വധുവും. എന്നാല് ഇവരില് ഒരാളുടെ പോലും പേര് അഗസ്റ്റിന് പറയുന്നില്ല എന്നത് ശ്രദ്ധേയമാണ്.
[തിരുത്തുക] അവലംബം
- ↑ Schwiebert, E.G. Luther and His Times. St. Louis: Concordia Publishing House, 1950, 136.
- ↑ Augustine, A New Biography, James J. O'Donnell
[തിരുത്തുക] കുറിപ്പുകള്
[തിരുത്തുക] കൂടുതല് വായനക്ക്
- The Story of Thought, DK Publishing, Bryan Magee, ലണ്ടണ്, 1998, ISBN 0-7894-4455-0
- അഥവാ The Story of Philosophy, Dorling Kindersley Publishing, 2001, ISBN 0-7894-7994-X
- (പുറഞ്ചട്ടയില് ഉപശീര്ഷകവത്കരിച്ചിരിക്കുന്നത്: The Essential Guide to the History of Western Philosophy)
- g Saint Augustine, pages 30, 144; City of God 51, 52, 53 and The Confessions 50, 51, 52
- - additional in the Dictionary of the History of Ideas for Saint Augustine and Neo-Platonism
[തിരുത്തുക] അവലംബം
- Brown, Peter. Augustine of Hippo. Berkeley: University of California Press, 1967. ISBN 0-520-00186-9
- Gareth B. Matthews. Augustine. Blackwell, 2005. ISBN 0-631-23348-2
- O'Donnell, James J. Augustine: A New Biography. New York: HarperCollins, 2005. ISBN 0-06-053537-7
- Ruickbie, Leo. Witchcraft Out of the Shadows. London: Robert Hale, 2004. ISBN 0-7090-7567-7, pp. 57-8.
- Tanquerey, Adolphe. The Spiritual Life: A Treatise on Ascetical and Mystical Theology. Reprinted Ed. (original 1930). Rockford, IL: Tan Books, 2000. ISBN 0-89555-659-6, p. 37.
- von Heyking, John. Augustine and Politics as Longing in the World. Columbia: University of Missouri Press, 2001. ISBN 0-8262-1349-9
- Orbis Augustinianus sive conventuum O. Erem. S. A. chorographica et topographica descriptio Augustino Lubin, Paris, 1659, 1671, 1672.
- Regle de St. Augustin pour les religieuses de son ordre; et Constitutions de la Congregation des Religieuses du Verbe-Incarne et du Saint-Sacrament (Lyon: Chez Pierre Guillimin, 1662), pp. 28-29. Cf. ലയോണില് പിന്നീട് പ്രസിദ്ധീകരിച്ച പതിപ്പ് (Chez Briday, Libraire,1962), pp. 22-24. ഇംഗ്ലീഷ് പതിപ്പ്, The Rule of Saint Augustine and the Constitutions of the Order of the Incarnate Word and Blessed Sacrament (New York: Schwartz, Kirwin, and Fauss, 1893), pp. 33-35.
- Zumkeller O.S.A.,Adolar (1986). Augustine's ideal of Religious life. Fordham University Press, New York.
- Zumkeller O.S.A.,Adolar (1987). Augustine's Rule. Augustinian Press, Villanova,
Pennsylvania U.S.A..
- René Pottier. Saint Augustin le Berbère. Fernand Lanore , 2006. ISBN 2-85157-282-2
- Fitzgerald, Allan D., O.S.A., General Editor (1999). Augustine through the Ages: An Encyclopedia. Grand Rapids: William B. Eerdmans Publishing Co.,. ISBN 0-8028-3843-X
- Plumer, Eric Antone, (2003). Augustine's Commentary on Galatians. Oxford [England] ; New York : Oxford University Press,. ISBN 0-19-924439-1 ISBN 978-0-19-924439-3 Preview from Google
 |
ക്രിസ്തുമതസംബന്ധമായ ഈ ലേഖനം അപൂര്ണ്ണമാണ്. ഇതു പൂര്ണ്ണമാക്കുവാന് വിക്കിപീഡിയ സംരംഭത്തില് പങ്കാളിയാവുക. (സഹായത്തിനു ഈ ലേഖനത്തിന്റെ ഇംഗ്ലീഷ് പതിപ്പ്) |
