എം. രാഘവന്
വിക്കിപീഡിയ, ഒരു സ്വതന്ത്ര വിജ്ഞാനകോശം.
 |
ഈ ലേഖനം ഏതെങ്കിലും സ്രോതസ്സുകളില് നിന്നുള്ള വേണ്ടത്ര തെളിവുകളെ ഉള്ക്കൊള്ളുന്നില്ല. ദയവായി യോഗ്യങ്ങളായ സ്രോതസ്സുകളില് നിന്നുമുള്ള അവലംബങ്ങള് ചേര്ത്ത് ലേഖനം മെച്ചപ്പെടുത്തുക. നിലവാരമില്ലാത്ത വസ്തുതകള് ചോദ്യം ചെയ്യപ്പെടുകയും നീക്കപ്പെടുകയും ചെയ്തേക്കാം. |
മലയാള സാഹിത്യത്തിലെ പ്രമുഖനായ ചെറുകഥാകൃത്തും നോവലിസ്റ്റും നാടകകൃത്തുമാണ് എം. രാഘവന് (ജനനം-1930). മയ്യഴിക്കാരനായ ഇദ്ദേഹം ഫ്രഞ്ച് എംബസ്സിയിലെ സാംസ്കാരികവകുപ്പില് സേവനമനുഷ്ഠിച്ചു.
ഉള്ളടക്കം |
[തിരുത്തുക] ജീവിതരേഖ
മയ്യഴിയിലെ മണിയമ്പത്ത് കുടുംബാംഗം.1930-ല് ജനനം. അച്ഛന് മണിയമ്പത്ത് കൃഷ്ണന് ഫ്രഞ്ചധീന മയ്യഴിയില് ഹോട്ടല് ഉടമയായിരുന്നു. മയ്യഴിയിലെ എക്കോല് സെംത്രാല് എ കൂര് കോംപ്ലമാംതേറില് നിന്ന് മികച്ച രീതിയില് ബ്രവേ പരീക്ഷ പാസ്സായ രാഘവന് സര്ക്കാര് ജോലി ലഭിച്ചു. മുംബെയിലെ ഫ്രഞ്ച് കോണ്സുലേറ്റിന്റെ സാംസ്കാരിക വിഭാഗത്തിലും ദില്ലിയിലെ എംബസ്സിയിലും ജോലി ചെയ്തു. 1983-ല് എംബസ്സിയുടെ സാംസ്കാരികവിഭാഗം സെക്രട്ടറിയായി ജോലിയില് നിന്നും വിരമിച്ചു.
ഇപ്പോള് മയ്യഴി അലിയാന്സ് ഫ്രാന്സേസിന്റെ പ്രസിഡന്റായി പ്രവര്ത്തിക്കുന്നു.
[തിരുത്തുക] സാഹിത്യജീവിതം
എം.ടി. വാസുദേവന് നായര്, എന്.പി. മുഹമ്മദ്, മാധവിക്കുട്ടി തലമുറയുടെ ഭാഗമായി എഴുതിത്തുടങ്ങി.അക്കാലത്തെ പ്രധാനപ്പെട്ട എല്ലാ സാഹിത്യപ്രസിദ്ധീകരണങ്ങളിലും രചനകള് പ്രസിദ്ധീകരിച്ചിരുന്നുവെങ്കിലും ധാരാളമായി എഴുതിയ എഴുത്തുകാരനായിരുന്നില്ല എം.രാഘവന്. ദില്ലിയിലെ മലയാളിസമാജത്തിന്റെ വാര്ഷികങ്ങള്ക്കായി നാടകങ്ങള് എഴുതി.
ജോലിയില് നിന്ന് പിരിഞ്ഞതിനു ശേഷം എഴുത്തില് സജീവമായി. നോവലുകള് ഇക്കാലത്താണ് എഴുതിയത്. ഇളക്കങ്ങള് എന്ന കഥ അതേ പേരില് ചലച്ചിത്രമായിട്ടുണ്ട്. ഫ്രഞ്ചില് നിന്നും ചെറുകഥകളും നാടകങ്ങളും മലയാളത്തിലേക്ക് വിവര്ത്തനം ചെയ്തിട്ടുണ്ട്.
[തിരുത്തുക] രചനാരീതി
കഥാപാത്രങ്ങളുടെ മാനസികലോകം അനാവരണം ചെയ്യുന്നതില് ശ്രദ്ധകേന്ദ്രീകരിക്കുന്നവയാണ് എം.രാഘവന്റെ കഥകള്. ചിത്തവൃത്തികളുടെ ചോദനകളിലേക്ക് വെളിച്ചം വീശുന്നവയാണ് ആദ്യ സമാഹാരമായ നനവിലെ രചനകള്. വ്യക്തിബന്ധത്തിന്റെ സങ്കീര്ണ്ണതകള് അവ സമര്ത്ഥമായി ഇഴപിരിച്ചു കാണിക്കുന്നു. പില്ക്കാലരചനകള് ആര്ദ്രമായ മാനസികാവസ്ഥ പ്രകടമാക്കുന്നു. വ്യക്തിജീവിതത്തിലെ ഒറ്റപ്പെടലുകളും ദൈന്യവും അനുതാപപൂര്വ്വം കൈകാര്യം ചെയ്യുന്ന ഹൃദയാലുവായ കാഥികനാണ് ഇവയില് കാണപ്പെടുന്നത്.
[തിരുത്തുക] കൃതികള്
- നനവ് (ചെറുകഥാസമാഹാരം)
- വധു (ചെറുകഥാസമാഹാരം)
- സപ്തംബര് അകലെയല്ല (ചെറുകഥാസമാഹാരം)
- ഇനിയുമെത്ര കാതം (ചെറുകഥാസമാഹാരം)
- നങ്കീസ് (നോവല്)
- അവന് (നോവല്)
- യാത്ര പറയാതെ(നോവല്)
- ചിതറിയ ചിത്രങ്ങള്(നോവല്)
- കര്ക്കിടകം(നാടകം)
- ചതുരംഗം (നാടകം)
- ദോറയുടെ കഥ, ഹെലന് സിക്സ്യൂവിന്റെ ഫ്രഞ്ച് നാടകത്തിന്റെ വിവര്ത്തനം
[തിരുത്തുക] പുരസ്കാരങ്ങള്
- മലയാളഭാഷയ്ക്കും സാഹിത്യത്തിനും നല്കിയ സംഭാവനകള്ക്കുള്ള അംഗീകാരമായി പുതുശ്ശേരി സര്ക്കാര് മലയാളരത്നം ബഹുമതി നല്കി ആദരിച്ചു.
- 2008 ലെ നോവലിനുള്ള അബൂദാബി ശക്തി അവാര്ഡ് ചിതറിയ ചിത്രങ്ങള്ക്ക്.
- 2008 ല് കേരള ഭാഷാഇന്സ്റ്റിട്യൂട്ടിന്റെ വൈക്കം മുഹമ്മദ് ബഷീര് പുരസ്കാരം ചിതറിയ ചിത്രങ്ങള് എന്ന നോവലിനു്.
