ഉത്രട്ടാതി (നക്ഷത്രം)

പുരാതനപൗരസ്ത്യജ്യോതിശാസ്ത്രത്തിലും ജ്യോതിഷത്തിലും നക്ഷത്രനാമങ്ങളിൽ 26-‌ാമത്തേതായി പരിഗണിക്കപ്പെടുന്നു ‘ഉത്രട്ടാതി’. ഉത്തരഭാദ്രപദം (ദേവനാഗരി: उत्तरभाद्रपदा)എന്നും അറിയപ്പെടുന്ന ഈ നക്ഷത്രം പൂർണ്ണമായും മീനം രാശിയിൽ ഉൾപ്പെടുന്നു.

ഉത്തരഭാദ്രപദത്തിലെ അംഗനക്ഷത്രങ്ങളുടെ ആകാശരേഖ

സ്ഥാനം

ഗാമ പെഗാസി, ആൽഫാ ആന്ദ്രൊമീഡിയ എന്നീ നക്ഷത്രയൂഥങ്ങൾ ആണു് ഉത്രട്ടാതിയിൽ ഉൾപ്പെടുന്നതു്. (ഭാരതീയജ്യോതിശാസ്ത്രത്തിലും ജ്യോതിഷത്തിലും ഒരു നക്ഷത്രനാമം എന്നതു് ഒന്നോ അതിലധികമോ നക്ഷത്രങ്ങൾക്കോ ആകാശത്തിലുള്ള അവയുടെ രാശിസ്ഥാനത്തിനോ കൊടുത്തിരിക്കുന്ന പേരാണു്). “ഉത്രട്ടാതി കട്ടിൽക്കാലുപോലെ” എന്നാണു് നക്ഷത്രനിരീക്ഷണം നടത്തുന്നവർക്കു് ഈ സ്ഥാനം തിരിച്ചറിയാനുള്ള അടയാളം. കട്ടിലിന്റെ രണ്ടു കാലുകൾ പൊലെയോ ഇരട്ടത്തലയുള്ള ആളായോ ഇരട്ടക്കുട്ടികളായോ ഉത്രട്ടാതിയുടെ രൂപം സങ്കൽ‌പ്പിക്കാറുണ്ടു്.