അപ്പോത്തിക്കെരി

വിക്കിപീഡിയ, ഒരു സ്വതന്ത്ര വിജ്ഞാനകോശം.
അപ്പോത്തിക്കെരി 15-ആം നൂറ്റാണ്ട്
19-ആം നൂറ്റാണ്ടിലെ അപ്പോത്തിക്കെരി

ഭിഷഗ്വരൻ എന്ന അർഥത്തിലുള്ള ഒരു പദമാണ് അപ്പോത്തിക്കെരി. Apothecary (/əˈpɒθɪkəri/) മധ്യകാലങ്ങളിൽ ഔഷധങ്ങൾ നിർമ്മിക്കുകയും വിൽക്കുകയും ചെയ്യുന്നവരെയാണ് ഇംഗ്ലണ്ടിലും സ്കോട്ട്‌ലണ്ടിലും അയർലണ്ടിലും ഈ വാക്കുകൊണ്ട് ഉദ്ദേശിച്ചിരുന്നത്. ഇന്ന് അപോത്തിക്കരിക്കു സമാനമായ പദം ഫാർമസിസ്റ്റ് എന്നാണ്. മിക്കവാറും രാജ്യങ്ങളിൽ അപ്പോത്തിക്കരി പദം ഉപയോഗിക്കുന്നില്ല. അപ്പോത്തിക്കിരി എന്നതിനേക്കുറിച്ച് ലഭ്യമായ ഏറ്റവും പഴയ തെളിവ് ക്രിസ്തുവിന് മുൻപ് 2600-ൽ ബാബിലോണിയയിൽ നിന്നുമാണ് ലഭ്യമായിട്ടുള്ളത്. [1]

പേരിനു പിന്നിൽ[തിരുത്തുക]

സാധനങ്ങൾ സൂക്ഷിക്കപ്പെടുന്ന സ്ഥലം എന്നർഥമുള്ള അപ്പോത്തിക്കെ (Apotheke) എന്ന ഗ്രീക്കുവാക്കിൽ നിന്നാണ് അപ്പോത്തിക്ക(ക്കി)രി എന്ന വാക്കിന്റെ ഉദ്ഭവം. ലത്തീൻ= അപോത്തിക്കാർ.

കേരളത്തിലെന്നപോലെ പാശ്ചാത്യരാജ്യങ്ങളിലും ഇവർ മരുന്നുണ്ടാക്കുന്ന ജോലിഅവലംബിച്ചവരായിരുന്നു.

ആദ്യകാല അപോത്തിക്കരികൾ[തിരുത്തുക]

ആദ്യകാല അപോത്തിക്കരികൾആ കാലഘട്ടത്തിലെ ബുദ്ധിജീവികളായിരുന്ന പുരോഹിതരും അധ്യാപകരും തത്ത്വജ്ഞാനികളുമായിരുന്നു. ചില ചെടികൾക്കു മുറിവ് ഉണക്കാനുള്ള കഴിവുണ്ടെന്ന് അവർ മനസ്സിലാക്കിയതോടെ, ചികിത്സാരീതിയിൽ അല്പം പുരോഗതിയുണ്ടായി. ഔഷധഗുണമുള്ള ചെടികളെ കണ്ടുപിടിക്കുകയും അവയെ ഉപയോഗപ്പെടുത്തുകയുമായിരുന്നു അവർ ചെയ്തത്. കാലംചെന്നതോടെ ഈ ജോലിയിൽ ഏർപ്പെട്ടിരുന്നവർ അപ്പോത്തിക്കരിമാർ എന്ന പേരിൽ അറിയപ്പെട്ടു. അപ്പോത്തിക്കരിമാർ പുസ്തകങ്ങളിൽ നിന്നും മറ്റും ലഭിച്ച അറിവിനെ ആധാരമാക്കി പരാശ്രയംകൂടാതെ ഗുളികകളും മറ്റും നിർമ്മിക്കുവാൻ തുടങ്ങി. ഇവർക്ക് പ്രത്യേകമായ അളവുസമ്പ്രദായങ്ങൾ ഉണ്ടായിരുന്നു[2] (Apothecaries weight & measure).

തുടക്കത്തിൽ ഔഷധങ്ങൾ നിർമ്മിക്കുന്നതിൽ മാത്രം ശ്രദ്ധിച്ചിരുന്ന അപ്പോത്തിക്കരിമാർ കാലംചെന്നതോടെ രോഗികളെ പരിശോധിക്കാനും ചികിത്സിക്കാനും തുടങ്ങി. റോയൽ കോളജ് ഒഫ് ഫിസിഷ്യൻസിന്റെ[3] അറിവോ സമ്മതമോ കൂടാതെ അനധികൃതമായാണ് ഇത് ആരംഭിച്ചത്. 1665-ലെ പ്ലേഗ് ആക്രമണസമയത്ത് ഭിഷഗ്വരന്മാരെല്ലാം ലണ്ടൻ നഗരം വിടുകയുണ്ടായി. എന്നാൽ അപ്പോത്തിക്കരിമാർ നഗരത്തിൽ തന്നെ താമസിക്കുകയും രോഗികളെ ശുശ്രൂഷിക്കുകയും ചെയ്തു. 1704-ൽ പ്രഭുസഭ അപ്പോത്തിക്കരിമാർക്ക് ഒരു അംഗീകൃത ഡോക്ടറുടെ നിർദ്ദേശപ്രകാരമല്ലാതെതന്നെ രോഗികളെ ചികിത്സിക്കുവാനുള്ള അനുവാദം നൽകുകയുണ്ടായി. എന്നാൽ മരുന്നുകൾക്കുള്ള വില ഈടാക്കാനല്ലാതെ പരിശോധനയ്ക്കുള്ള ഫീസ് വാങ്ങാൻ ഇവരെ അനുവദിച്ചിരുന്നില്ല. 1774-ൽ സൊസൈറ്റി ഒഫ് അപ്പോത്തിക്കരീസ്[4] വൈദ്യവൃത്തി ചെയ്യുന്നവരെ മാത്രം സൊസൈറ്റിയിൽ അംഗങ്ങളാക്കിയാൽ മതി എന്നൊരു പ്രമേയം പാസ്സാക്കുകയുണ്ടായി. 1815-ൽ ബ്രിട്ടിഷ് പാർലമെന്റിന്റെ ഒരു നിയമപ്രകാരം ഇംഗ്ലണ്ടിലും വെയിൽസിലുമുള്ള എല്ലാ അപ്പോത്തിക്കരിമാരെയും പരിശോധിക്കാനും, അവർക്ക് അംഗീകാരം നൽകണമോ വേണ്ടയോ എന്നു തീരുമാനിക്കാനും അപ്പോത്തിക്കരിമാരുടെ സൊസൈറ്റിയെ അധികാരപ്പെടുത്തുകയുണ്ടായി. ഈ നിയമം അതുവരെ പ്രത്യേകം ചിട്ടപ്പെടുത്തിയ ഒരു പഠനക്രമമില്ലാതിരുന്ന വൈദ്യശാസ്ത്രപഠനത്തിന് ഒരു ഉത്തേജനം നൽകുകയുണ്ടായി. 19-ആം നൂറ്റാണ്ടിൽ വൈദ്യശാസ്ത്രപഠനത്തിനും വൈദ്യവൃത്തിക്കും ഒരു പ്രത്യേക പദവിയും അംഗീകാരവും നേടിയെടുക്കുന്നതിൽ അപ്പോത്തിക്കരിമാർ ചെയ്ത സേവനങ്ങൾ പ്രത്യേകം ശ്രദ്ധാർഹമാണ്.

പരിഷ്കൃതകാലഘട്ടത്തിൽ ഫാക്ടറികളും മറ്റും മരുന്നുകൾ ഉത്പാദിപ്പിക്കാൻ ആരംഭിച്ചതോടെ അപ്പോത്തിക്കരി എന്ന വിഭാഗം ഏതാണ്ട് അപ്രത്യക്ഷമായി എന്നു പറയാം.

അവലംബം[തിരുത്തുക]

  1. Allen, Jr, Lloyd (2011). A History of Pharmaceutical Compounding (PDF). Secundum Artem, Volume 11 Number 3. Archived from the original (PDF) on 2013-01-28. Retrieved 2018-02-27.{{cite book}}: CS1 maint: location (link) CS1 maint: location missing publisher (link)
  2. http://www.homeoint.org/cazalet/weight/index.htm
  3. http://www.rcpe.ac.uk/
  4. http://www.facebook.com/pages/Worshipful-Society-of-Apothecaries/102313186488549

പുറംകണ്ണികൾ[തിരുത്തുക]

Wiktionary
Wiktionary
കടപ്പാട്: കേരള സർക്കാർ ഗ്നൂ സ്വതന്ത്ര പ്രസിദ്ധീകരണാനുമതി പ്രകാരം ഓൺലൈനിൽ പ്രസിദ്ധീകരിച്ച മലയാളം സർ‌വ്വവിജ്ഞാനകോശത്തിലെ അപ്പോത്തിക്കരി എന്ന ലേഖനത്തിന്റെ ഉള്ളടക്കം ഈ ലേഖനത്തിൽ ഉപയോഗിക്കുന്നുണ്ട്. വിക്കിപീഡിയയിലേക്ക് പകർത്തിയതിന് ശേഷം പ്രസ്തുത ഉള്ളടക്കത്തിന് സാരമായ മാറ്റങ്ങൾ വന്നിട്ടുണ്ടാകാം.
"https://ml.wikipedia.org/w/index.php?title=അപ്പോത്തിക്കെരി&oldid=3640056" എന്ന താളിൽനിന്ന് ശേഖരിച്ചത്