അംഗിരസ്സ്
വിക്കിപീഡിയ, ഒരു സ്വതന്ത്ര വിജ്ഞാനകോശം.
 |
ഈ ലേഖനം വിക്കിവല്ക്കരിക്കേണ്ടതുണ്ട്; താങ്കളുടെ സഹായം പ്രതീക്ഷിക്കുന്നു. |
ഭാരതീയ പുരാണങ്ങളില് പരാമര്ശിക്കപ്പെട്ടിട്ടുള്ള ബ്രഹ്മാവിന്റെ മാനസപുത്രനായ മഹര്ഷിയാണു അംഗിരസ്സ്. അഥര്വ്വവേദത്തിന്റെ ഉപജ്ഞാതാക്കളില് ഒരാളാണ് അംഗിരസ്സ് എന്ന് ഹിന്ദു ധര്മ്മശാസ്ത്രം വിശ്വസിക്കുന്നു. അഥര്വമുനിയുമൊത്താണ് ഇദ്ദേഹം അഥര്വ്വവേദം നിര്മ്മിച്ചതെന്ന് കരുതുന്നു. ഇദ്ദേഹം സപ്തര്ഷിമാരില് ഒരാളാണെന്നും വിശ്വസിക്കുന്നവരുണ്ട്.
ആഗ്നേയി(അഗ്നികന്യക)യുടെ ഗര്ഭത്തില്നിന്നു ജനിച്ചവന് എന്ന അര്ഥത്തിലാണ് അംഗിരസ്സ് എന്ന പേരുണ്ടായത്. ശിവന് യാഗം അനുഷ്ഠിച്ചുകൊണ്ടിരിക്കുമ്പോള് സന്നിഹിതരായ അപ്സരസ്സുകളെക്കണ്ട് കാമാര്ത്തനായിത്തീര്ന്ന ബ്രഹ്മാവിനു രേതഃസ്ഖലനം ഉണ്ടായെന്നും ശിവന് അതു യാഗാഗ്നിയില് നിക്ഷേപിച്ചുവെന്നും ഹോമകുണ്ഡത്തിലെ 'അംഗാര' (തീക്കനല്) ത്തില്നിന്ന് ഉദ്ഭവിച്ചവനാകയാല് അംഗിരസ്സ് എന്ന പേരു സിദ്ധിച്ചുവെന്നും വേറൊരു കഥയും പ്രചാരത്തിലുണ്ട്.
അംഗിരസ്സ് മഹര്ഷിക്കു കല്പിച്ചു കൊടുത്തിരിക്കുന്ന ചില വിശേഷണങ്ങള് ഇവയാണു:
- ഇരുപത്തൊന്നു പ്രജാപതികളില് ഒരാള്
- സപ്തര്ഷികളില് ഒരാള്;
- പിതൃക്കളുടെയും ദേവന്മാരുടെയും പുരോഹിതന്;
- യാഗാധീശനായും ചിലപ്പോള് അഗ്നിപിതാവായും
- ശ്രുതികളില് പരാമൃഷ്ടന്;
- അനേകം വേദസൂക്തങ്ങളുടെ കര്ത്താവ്;
- മേരുവില് ശിവപാര്വതിമാരെ ശുശ്രൂഷിച്ച മഹര്ഷികളില് ഒരാള്.
അര്ജുനന്റെ ജനന സമയത്തും ഭീഷ്മരുടെ ശരശയനവേളയിലും ഇദ്ദേഹം സന്നിഹിതനായിരുന്നതായി മഹാഭാരതത്തില് പറയുന്നു. ദക്ഷപുത്രിമാരായ ശിവ, സ്മൃതി, ശ്രദ്ധ, സ്വധ എന്നിവര് ഇദ്ദേഹത്തിന്റെ ഭാര്യമാരാണ്. ശുഭ എന്നൊരു ഭാര്യയിലുണ്ടായ സന്താനങ്ങളത്രേ ബൃഹസ്പതി എന്ന പുത്രനും ഭാനുമതി, രാഗ, സിനീവാലി, അര്ച്ചിഷ്മതി, ഹവിഷ്മതി, മഹിഷ്മതി, മഹാമതി, കുഹു എന്ന എട്ടുപുത്രിമാരും. ഉതഥ്യന്, മാര്ക്കണ്ഡേയന് എന്നു രണ്ടു പുത്രന്മാര് കൂടി അംഗിരസ്സിനുണ്ടായിരുന്നതായി പുരാണങ്ങളില് കാണുന്നു. അപുത്രനായ രഥീതരന് എന്ന ക്ഷത്രിയന്റെ ഭാര്യയില് ഇദ്ദേഹം ബ്രഹ്മതേജസ്സുളള പുത്രന്മാരെ ജനിപ്പിച്ചതായും കഥയുണ്ട്. അംഗിരസ്സും അഥര്വനും പരസ്പരം ഗാഢബന്ധമുണ്ടായിരുന്ന രണ്ടു ഗോത്രങ്ങളുടെ തലവന്മാരാണ്. ഇവരുടെ പിന്ഗാമികളെ പൊതുവില് 'അഥര്വാംഗിരസന്മാര്' എന്നു വിളിച്ചുവന്നു. ആംഗിരസന്മാരെ അഗ്നിയോടും യാഗകര്മങ്ങളോടും ബന്ധപ്പെടുത്തിയുളള പരാമര്ശം വൈദികസാഹിത്യത്തില് പലേടത്തും കാണാം. അവര് വിദേഹരാജാക്കന്മാരുടെയും വൈശാലിരാജാക്കന്മാരുടെയും വംശപുരോഹിതന്മാരായിരുന്നിട്ടുണ്ട്. ഉതഥ്യന്, മാര്ക്കണ്ഡേയന്, ദീര്ഘതമസ്സ്, ഘോരന് എന്നിവര് അംഗിരസ്സിന്റെ വംശത്തിലെ ചില സുഗൃഹീതനാമാക്കളാണ്. ബൃഹസ്പതിചക്രത്തില്പ്പെട്ട അറുപതു വര്ഷങ്ങളില് ആറാമത്തേതിന് ആംഗിരസമെന്ന് പറയുന്നു.
അംഗിരസ്സ് എന്നപേരില് ഒരു സ്മൃതികാരനും ജ്യോതിഃശാസ്ത്രജ്ഞനും ഉണ്ട്. അംഗിരസ്സ് എന്നപദം ബൃഹസ്പതിയുടെയും അഗ്നിയുടെയും പര്യായവുമാണ്.
[തിരുത്തുക] അവലംബം
 |
ഈ ലേഖനം, കേരളസര്ക്കാര് സ്വതന്ത്രപ്രസിദ്ധീകരണാനുമതി (GFDL) നല്കിയ മലയാളം സര്വ്വവിജ്ഞാനകോശത്തിലെ അംഗിരസ്സ് എന്ന ലേഖനത്തിന്റെ ഉള്ളടക്കം ഉപയോഗിക്കുന്നുണ്ട്. വിക്കിപീഡിയയിലേക്കു് പകര്ത്തിയതിനു് ശേഷം പ്രസ്തുത ഉള്ളടക്കത്തിനു് സാരമായ മാറ്റങ്ങള് വന്നിട്ടുണ്ടാകാം. |
 |
ഹിന്ദുമതവുമായി ബന്ധപ്പെട്ട ഈ ലേഖനം അപൂര്ണ്ണമാണ്. ഇതു വികസിപ്പിക്കുവാന് സഹായിക്കുക. |
